|
Precis avant ün on n’haja vis a Deep Purple l’ultima jada in occasiun dal Summerside Festival a Grenchen. Pac temp davo n’haja scrit ün text da blog cul titel “Das Deep-Purple-Dilemma”. Il messagi central d’eira cha quista gruppa da rock saja adün’amo üna da las megldras gruppas dal muond adonta cha lur chantadur Ian Gillan haja cumplettamaing pers sia vusch schi’s tratta da concerts sül palc. Aint il studio cun tuot la tecnica disponibla esa alch tuot oter. Là sa eir Gillan adün’amo da persvader a l’auditura o l’auditur.
Her saira suna tuornà al Summerside Festival, ma quista jà pel concert da Dream Theater. Sper Deep Purple d’eira quista gruppa da rock progressiv our dals contuorns da New York üna da las gruppas las plü importantas in mia giuventüna e dürant meis prüms ons d’adolescenza. Dal 2010 però vaiva il battarist Mike Portnoy annunzchà ch’el banduna la gruppa e ch’el perseguitescha da quinderinavant agens progets musicals. Seis successur d’eira eir el ün stupend battarist, ma la musica s’ha müdada ed es gnüda plü lungurusa a meis parair. Eu tils n’ha vis amo üna jada, ma la magia dals ons novanta d’eira davent. Dimena n’haja cumanzà a tadlar ad otras gruppas ed ha plan planet invlidà a Dream Theater. Fin d’utuon passà cur chi’d es gnü annunzchà cha Mike Portnoy tuorna illa gruppa. Da prümavaira es gnü publichà il nouv album cun quista fuormaziun reunida e cun quai s’ha eir müdà danouvamaing il stil – damain brutalità, daplü musicalità e creatività. Dream Theater d’eira reabilità, Dieu saja lodà! Her saira suna dimena stat tendü sco la corda dal balaister sün quist retuorn sül palc. Ed i d’eira ün sömmi! Ün SÖMMI! Novanta minuts plain virtuosità, creatività ed energia. Quels tschinch musicists baintschantats han demuossà chi sun adün’amo (o darcheu) qua. E co! Ün on davo’l dilemma da Deep Purple n’haja gnü la furtüna dad esser perdütta da la resüstanza da Dream Theater. Uossa suna fingià be buonder che miracul chi’m spetta al Summerside l'on chi vain 😊
0 Kommentare
Antwort hinterlassen
Davart quist blog
Quia prouva da notar ün pêr observaziuns sur dal minchadi o minchatant perfin meis impissamaints filosofics per rumantsch. Du sprichst kein Romanisch?
Schade, aber das lässt sich ändern. Die Lia Rumantscha bietet eine Vielfalt an Kursen an - da ist bestimmt auch etwas für dich dabei. Und bis dahin kannst du die romanischen Text mit Textshuttle übersetzen lassen :-) Archiv
April 2025
Kategorien |
RSS-Feed