Co inavant cun quist blog?

Dürant s-chars desch ons n’haja gestiunà mia pagina da rait lukasreinhard.ch ingio chi’s trattaiva tuot intuorn meis passatemp sco curridur e las cuorsas ingio ch’eu n’ha tut part. Ma cur ch’eu n’ha glivrà da cuorrer a la fin dal 2022, n’haja eir stuvü ponderar l’avegnir da mia pagina. Co vessa pudü cuntinuar da scriver our da la vita in duos s-charpas da gimnastica sch’eu svess nu faiva plü ingün pass daplü co necessari?

Culla pagina preschainta musicultra.ch n’haja cumanzà ün spazi nouv per am occupar da robas chi han impli quista locca cha’l cumgià dal sport vaiva s-charpà sü. D’üna vart es quai la musica ed impustüt meis passatemp sco battarist. Quista part da la pagina nomnada “musica” gira ter bain e grà als videos publichats suna intant eir gnü in contact cun varsaquant:as musicist:as. Tanter oter n’haja sün quista via ed in cumbinaziun cun ün inserat sün üna pagina da musica eir chattà a la gruppa The Southern Project cun quella ch’eu sun daspö ün on.

Tschella part da musicultura.ch s’occupa da la cultura e lingua rumantscha – mia seguonda (o dafatta prüma?) paschiun ultra da la musica. La part “cultura” cuntegna pel mumaint ün per colliaziuns sün paginas rumantschas, sül chalender.ch ed impustüt sülla pagina da nossa Uniun cultura rumantscha Basilea e contuorns, da quala ch’eu sun commember ed organisatur dal chant cumünaivel mensil.

Rest’amo il blog. Quel d’eira ün grond success dürant meis temp sco curridur. I d’eira halt eir fich simpel da scriver sur da l’experienza süllas cuorsas perche cha là s’haja gnü da tuottas sorts aventüras. Aint il tren o l’aviun sün viadi a chasa n’haja gnü temp e peida da scriver sü che chi m’es capità sün desch, vainchün o dafatta quarantaduos kilometers.

Ma uossa? Intant n’haja scrit ün pêr contribuziuns – per part sün tudais-ch, per part sün rumantsch. Impustüt ils texts rumantschs sun ün bunischem exercizi per dovrar la lingua productivamaing. Da tschella vart am stöglia dumandar schi saja indichà da publichar texts in üna lingua estra sainza tils laschar lectorar dad üna persuna indigena. E da che possa scriver vairamaing? Esa propcha uschè interessant pel public da leger che cha ün ex-curridur / neo-grassottel vess da dir? Forsa na.

Eu vess però gust da gestiunar quist blog darcheu ün pa plü activamaing e da scriver eir plü suvent. Implü esa eir important ch’eu scriv darcheu daplü per rumantsch per schlargiar eir quist aspet da l’adöver da la lingua. Perquai n’haja decis da scriver da quinderinvia be amo sün rumantsch. Chi chi ha gust da leger meis scrivöz per tudais-ch, sarà bainvgnü:da da til tradüer cun l’agüd da Textshuttle. E chi chi sa rumantsch e legia per cas quist blog sarà adüna bainvgnü:da da’m dar ün rebomb e da’m correger.